De Waereld in Limburg, ‘n serie programs euver Limburgse taol en cultuur op L1 TV
Op L1 TV is momenteel ’n serieprograms te zien boe-in Frans Pollux de kieker mètnump op ’n fascinerende reis langs de väölzijdege Limburgse cultuur en taol. Pollux geit op zeuk nao bezunder verhaole die us mie kinne vertèlle euver ’t oontstoon vaan de provincie. Op zien reis bezeuk heer plaotse in ’t huidege Limburg die ’n umvaankrieke historie verberge. Dink aon ’t historische kloester in Wittem, de Curfsgroeve in Meersse, de Roeminse Therme in Heerle en ’t groetsjaoleg landbouwgebeed in Ysselstein. Um hei mie euver te wete te koume sprik Pollux mèt experts euver belaankrieke thema’s zoe wie landsjap, staotsvörming, religie, migratie en immaterieel erfgood.
De serie besteit oet 5 aoflieveringe die zien oonderverdeild nao de volgende thema’s
- Wie ’t Limburgs landsjap gevörmp woort
In de ierste aoflievering duke veer ech in de Limburgse boojem. Veer beginne in de ‘Grand Canyon vaan Limburg’, de Curfsgroeve. Hei weurt us vertèld wie de mins, veur melgerwinning, ’t landsjap nao zien hand heet gezat. Daonao stap Frans letterlek miljoene jaore trök in d’n tied tijdens ’n roondleiing in de Geulemergroeve. Geer kint dees aoflievering hei trökkieke. - Euver historie en staotsvöming
In de twiede aoflievering goon veer op zeuk nao sjatte oonder de Limburgse groond. De Limburgse boojem ligk naomelek vol mèt beelde, munte en ander spölle oet de iewe-aw historie vaan ’t gebeed. In restauratieatelier Restaura liet Frans ziech verrasse door versjèllende bezunder voondse oet de Romeinsen tied. Dee Romeinsen tied kump mesjiens wel ’t mies tot leve in ’t Thermemuseum in Heerle. Hei nump Frans daan ouch ‘nen duuk in de iewe-aw verhaole vaan ’t bès bewaorde badhoes vaan eus land. Geer kint dees aoflievering hei trökkieke. - D’n invlood vaan religie
In de derde aoflievering vertèlt Frans wie religie eus provincie gevörmp heet. Väöl kèrke u mus eweg höbbe allewijl ’n ander bestumming es wie ze iers hadde, vaan trampolienepark tot sportsjaol of bookhandel. Toch is ’t nog neet zoe lang geleie tot ’t geluif ’n centraol rol in ’t leve vaan de Limburger späölde. Zoe geit Frans op bezeuk in de awste baseliek vaan eus land (de Sintervaosbaseliek in Mestreech). Geer kint dees aoflievering hei trökkieke. - Migratie is ech typisch Limburgs
In de veerde aoflievering geit Frans op oonderzeuk oet nao euze en zienen eige achtergroond. Migratie is naomelek e belaankriek oonderdeil vaan eus provincie, echt typisch Limburgs. Dink aon de arbeidsmigrante vaan noe, de Törke, de Molukkers, de koempels vaan vreuger, zelfs ’t allerierste begin vaan ‘de Limburgers’ kump veurt oet migratie. De ierste Limburgers waore naomelek migrante in Elsloo. Geer kint dees aoflievering hei trökkieke. - Immaterieel erfgood en taol
In de vijfde aoflievering vaan de serie ‘De waereld in Limburg’ kump oonder mie de Limburgse taol aon bod. Vastelaovend vörmp daobij ’n belaankrieke inspiratiebron meh ouch in de devotie vaan ieredeenste en percessies späölt de Limburgse taol ’n rol. Frans maakde opnaomes tijdens Vastelaovend 2024 in versjèllende Limburgse plaotse meh ouch vaan de broonk percessie in Eijsde. Geer kint dees aoflievering hei trökkieke.
De tv serie ‘De waereld in Limburg is’ mèt meugelek gemaak door Veldeke Limburg, Coöperatie Erfgoed Limburg en de Provincie Limburg.
