Mèt de bös nao Friesland

’n Oetgebreide dillegatie vaan Limburgse Staotelede, boe-oonder député Jasper Kuntzelaers, is mèt de bös nao Friesland getoge um ziech te laote informere euver de veur- en naodeile vaan de erkinning vaan ’t Limburgs es Staotus III vaan ’t Europees Handves veur regionaol taole. En ze woorte daobij vergezèld door vertegenwoordegers vaan de belangriekste taolorganisaties in eus provincie zoewie Veldeke Limburg, de Limbörgse Academie, Levende Taole Limburgs en ’t Hoes veur ‘t Limburgs. Naomens Veldeke zaote veurzitter Reg van Loo en bestuurslid Bas Vissers in de bös.

Erkenning Europees Handvest Deel III

De Limburgse taol heet noe de erkinning vaan Staotus II oonderwijl ’t Fries volgens Staotus III erkind is. Deen hoegere staotus heet oondermie consequenties veur de financiëel oondersteuning vaan ’t Riek bij ’t bevordere en behaajd vaan de regionaol taol. Meh dao zitte ouch ’n aontal verpliechtinge aon vas die neet zoe ein twie drei in te völle zien. Tijdens d’n oontvaangs door ’t Fries provinciebestuur in Leeuwarden is de dillegatie oet Limburg dao oetgebreid euver geïnformeerd.

Zoe waor dao oonder mie ’n lezing door professor Jensma vaan de Universiteit vaan Groninge euver wat Friesland allemaol deit um de Friese taol levendeg te hawwe. En die bemeujenis strèk ziech oet vaan de veursjaolsen opvaank tot in de rechszaol en de gezoondheidszörg. Député Kuntzelaers is door ’t bezeuk nao eige zègke gestèrk in zien euvertuiging tot ouch de Limburgse taol de Staotus vaan Deil III verdeent meh heet ziech ouch gerealiseerd tot dao nog väöl werk verzat moot weure veurtot ’t zoewied is. Op samewèrking mèt Friesland daobij maag door dit bezeuk in eder geval gerekend weure.