Festival Vocallis 2024 zèt Limburgse taol op meziek
Meziekfestival Vocallis en Veldeke Limburg höbbe sinds einege jaore e partnersjap. In ’t kader daovaan nump Vocallis eder jaor e Limburgstaoleg oonderdeil in zie program op. Deze kier is dat e gediech vaan John Bovenbdeert oet Heële wat aonslut bij ’t thema vaan ’t festival 2024: “Inspiratie”. Bezunder is tot dat gediech door ‘ne componis speciaol veur ’t festival op meziek weurt gezat.
Conzèr in de Kopermeule in Vaols
De gediechte vaan John Bovendeert- in ‘t Limburgs en in ‘t Nederlands – zien op meziek gezat door Asja Kadic en Freya Wolf en weure gezoongen door Bibi Ortjens, sopraan, ierder winneres vaan de Vocallis Leedprijs. Ze weurt begeleid op piano door Jana Schell.
‘t Conzèr vint plaots op zoondagmiddag 27 oktober a.s. in de Kopermolen in Vaols vaanaof 14.30 uur.
Neve de compositie-opdracht weurt oonder mier pianomeziek vaan Rachmaninov, Liszt en Piazzola gespäöld door Camille Beniest, piano en zaank, Chloé Beniest, piano en Gill Masson, piano.
Korting veur Veldeke Lede
D’n entree bedreug € 15,00 meh lede vaan Veldeke kinne dit conzèr bijwoene veur de speciale studentepries vaan € 7,50 (excl. € 0,99 servicekoste). Geer kint eur (studente)keertsje bestèlle op de website vaan Festival Vocallis. Es geer daan aon de receptie melt tot geer vaan Veldeke zeet, daan maag geer met korting nao binne.
Hei volg ‘t gediech dat John Bovendeert veur Vocallis sjreef:
Thema: Creatieve inspiratie, het wonderlijke moment dat zich aandient, pas als je er van binnenuit open voor staat.
Flüster mich aa…
Doe… flüster mich aa uëverdaag,
of wek mich dis nach, want ich wach
óp ‘t roesje langs tek durch d’r wink,
de vroag vrei-oet van ’t kink,
of d’r vónkele glui van ing vallende sjter.
mmmmm mmmmm
Doe… flüster mich aa mit e reurend gedich,
of de lach van ‘t oape gezich.
Inne toeën in ing sóng ónbekind.
‘t Akkoad wat passend genau mich verras,
wie d’r dans van ‘t lich i gebrankkluurig glas.
mmmmm mmmmm
‘t Treffe … kót, ’t moment ónverwach,
’t wachte vilt lang. Ich sjtoa vuur d’r sjpegel
en vroag mich: Weë bis doe, woe ich noa verlang?
Dat silhouet, deë blik, die sjtum, deë tred.
Doe bis mich neet vreëm!… vreëm bis doe mich neet!
mmmmm mmmmm
Of zien ich i dich… i dich ‘t gezich
Va michzelver… mieng ege ich?
(John Bovendeert, januari 2024 Vocallis)