Sjeng, Sjer & de Sjele, dialekmeziek boeste blij vaan weurs

Bij de naom dinkste neet metein aon e meziekgezèlsjap meh Sjeng, Sjer & de Sjele make wel degelek meziek, en wat veur meziek! Wie ze zelf zègke: trök nao de roots, trök nao d’n intieme sfeer vaan de kroeg, ‘ne mix vaan country, blues, folk en hoempapa. En veural: väöl lol. Sjer späölt gitaar, Sjeng op accordeon en zinge doen ze same. De Sjele späölt op d’n achtergroond contrabas.

Op ‘t Sjop

Sjeng en Sjer is ‘ne in Mestreech gebore en opgegreujden twierling dee al vaan keends aof aon same meziek maak. Wie ze zestien waore zaote ze al in ‘ne rockabilly band. En noe höbbe ze same mèt de Sjele ’n riechtege LP oetgebrach die “Op ‘t Sjop” es titel heet, nao de rippetitieruimte in Mheer boe ze oontèlbaar ore oefenend höbbe doorgebrach. De tekste zien de lèsten tied veurnaomelek in ’t Limburgs en soms ouch in ’t Ingels.

Paradiso

Ein vaan de zeve nömmers op de LP hèt ’t Merie nao ‘ne bekinde kaffee in ’t Zuidelekste puntsje vaan Limburg. Dee nömmer is gesjreve veur de gelegenheid tot ze in ’t veurprogram vaan Neet oet Lottum höbbe opgetrooje in Paradiso. En wat te dinke vaan de nömmer Durrepfigure boe-op ze same musicere mèt de hermenie vaan Mheer.

De LP is te koup bij optrejjes en ouch online te bestèlle op de website. Es bezunder service bringe ze die thoes es me in de regio Mestreech-Heuvelland woent. RTV Maastricht maakde nog neet zoe lang geleie ‘n reportaasj euver ‘t trio, die geer hei kint bekieke.