De 250 sjunste plekke va Heële i bild

Teëge end november bringt Veldeke Heële ’t fotobook “De 250 Sjunste Plekke va Heële” oet. In de zestiger joare va d’r vurrige  ieëw woar Heële ee va de riekste sjteë va Nederland. De sjtad floreerde en de i-woëner woare gruetsj óp hun sjtad. Deë  sjtols bliek bei vöäl lüj versjwoende te zieë en deks weëd alling nog mar sjtilgesjtange bei wie sjoeën Heële vreuger toch woar.

Dat is ram ten ónrech en Veldeke Heële wilt mit foto’s va de 250 sjunste plekke i Groeët-Heële zieë loate wie sjoeën Heële nog ummer is: moderne en historiesje gebui, va arsjetektisje hoeëgtepunkte bis sjtroate, pleie, parke en höäf zoeë wie óch landsjappe, kirke, kasjtieële, “Street-art”  en mieë. Bewus is gekoaze vuur ing beperking va 250. Dat is mar ing fraksie van ’t totaal aa-bod.

Dit book  weëd i “full colour” oetgebrach en hat 264 pagina’s. ’t Formaat weëd zoeëget 30×30 cm, en d’r zint kótte besjrievinge va de foto’s en inge plattegrónk i te vinge zoeëdat de plaatsje óch bezeuk kinne weëde (went ze teminte oapenbaar touwgenkelig zint).

Lay out : Wout Desigh i Nuth, druk: Impreso Mastreech.

Vier sjtónd nog oape vuur suggesties vuur sjoeën plekke!
Went lüj die hant kinne ze ós maile (info@veldeke-heerlen.nl) of de suggesties melde óp ós FaceBook pagina (www.facebook.com/de250mooisteplekkenvanheerlen)

Finansjeel kriege vier óngersjteuning va IBA Parkstad (via ’t bewonersfonds “Bewoners Maken Parkstad”), de Gemeente Heële, Veldeke Limburg en “Heerlen Mijn Stad”.

D’r winkelpries vuur ’t book weëd € 19,95. Went lüj ’t noe bei vuur-i-tekening besjtelle, kos ’t book mar € 15,–. Mieë info uëver besjtelle? Mail info@veldeke-heerlen.nl. of bel vuur algemene informasie  d’r Mat Snijders: 06 – 215 17 593.