Duvelsprie, ‘nen historische roman euver Limburg vaan Jos Bours

De aofgeloupe 2 jaor heet Jos Bours gewèrk aon ‘ne historische roman getiteld Duvelsprie. ’t Verhaol is gebaseerd op ‘ne woergebäörde historie die d’n auteur op ’t spoor kaom door oonderzeuk nao de stamboum vaan ziene partner Marlies Hautvast. ’t Verhaol späölt ziech aof in ’t geboortedörp vaan allebei, Sjinne. De roman is in ‘t Nederlands gesjreve meh dao koume oonvermijelek väöl Limburgse oetdrökkinge in veur.

Veer sjrieve ’t jaor 1721. Anna, e meidske vaan 16 en häöre vrund Jean koume mèt hunne pasgebore zoon Joes aon in ’t Zuid-Limburgse Sjinne, ’n dörpke tösse Sittard en Heerle. Ze zien op de vlöch veur sjan en ermooj. Bij aonkoms störf pa Jaen oonverwachs. Noe moot Anna ziech mèt häör kinneke allein zien te redde in ‘n streng religieus umgeving. Boe ’t op dat momint oonrösteg is.

De bevolking verermp, ’s nachs weurt ingebroke in kèrke en groete boerderije. De otoriteite reagere mèt fakeverhaole en e genadeloes gevech tege ederein dee ziech neet oonderwörp aon hun gezag: in hoonderde processe weure hoonderde lui vervolg en ter doed gebrach, de zoegenaomde bokkerijers. Ouch in Sjinne.

De jong moojer en häör zäönsje Joes weure aonvaankelek mètgesleip in dee kolkende stroum. Meh in de loup vaan jaore liekent Anna grip op häör leve te kriege. ’t Geit ummertouw beter mèt häör en häör keend. En toch vringk dao nog get. Wie mie ’t leve häör sjink, wie mie tot ze kwiet raak. Dat joonk, fel meidske, die duvelsprie , die aonvaankelek allein de weeg vaan häört hart volgde, maak gaondeweeg berekenende käözes, die tot naodeil zien vaan geleefde en lui die zoe zwaak zien wie zie oets waor.

’t Book Duvelsprie weurt geprizzenteerd op 28 aprèl in de Alfa Brouwerij in Sjinne. Daonao volg nog ’n prizzentatie in de Cereolfebrik in Utrech op 16 mei a.s.