Expositie leesplenkskes in Museum Land van Valkenburg

In Museum Land van Valkenburg is vaan 15 juli tot 21 oktober 2018 ’n bezunder collectie leesplenkskes te zien. Ze varière vaan plenkskes in versjèllende Limburgse dialekte tot oetveuringe mèt verawwerde wäörd of veurwerpe.

Leonie Robroek oet Landgraaf verzamelde dees collectie in de loup vaan jaore. Leonie oontworp zelf veer leesplenkskes veur dialekoonderwies in häör eige gemeinte en sjreef dao e book euver mèt es titel “Aap bis Zwjaan”.

’t Mies bekinde leesplenkske is ’t Nederlandse “Aap – Noot – Mies” wat indertied oontwikkeld woort es hölp bij ’t leesoonderriech op de lieger sjaol. ’t Ierste Limburgse leesplenkskes kaom oet in 1984 Mestreech. Noe kint Limburg al 66 versjèllende plenkskes. Meh ’t leesplenkske is eigelek vaan Duitse origine. Veur mie informatie kint geer terech op de website vaan ’t Museum.