Expositie: Veldeke Krink Ech is “Gruuets” op zien taal

Vanaaf 1 december löptj in ’t Cultuurhoes aan de Plats in Ech ’n tentoanstelling ónger de naam “Gruuets”. Op initiatief van ’t Museum van de Vrouw laote de vaste gebroekers van dit geboew dao-in zeen wo ze vènje det se in de gemèndje Ech-Zöstere gruuets op kèns zeen. De algemein inleiding geuf aan: “Gruuets op det smaal stökske Nederlandj, wo-in w’r laeve. De kerne en dörpkes mit hun eige kènmerke, de natuur mit groate versjille in de landjsjappe en mit hunne bizunjere flora en fauna. ’t Boetelandj, altied kortbie”. Det weurtj allemaol uitgedröktj in foto’s en väörwerpe, en inbrèng van bewoners.

Veldeke Krink Ech, ein van die vaste gebroekers, hoofdje bie de väörbereidinge neet lang te dènke waat zie zoewe inbrènge: oos taal en daobönne de versjille in dialecte bv. tösse ’t Zösters en ’t Echs.

Op de tentoanstèlling zichbaar gemaaktj mit groate posters mit spreuke, gedichte, ’n spelke väör kènjer det ouch väör de aojers interessant kan zeen, en loesterverhaole in ’t plat es se op versjillendje plekke op de tentoanstèlling de tillefoon oppaks…

Nao ’n oetgestèldje äöpening in verbandj mit de coronaregels is de tentoanstèlling noe toch toegankelik tiedes de gebroekelike äöpeningstieje van ’t museum, mit coronacheck en móndjkepke. Tót mei 2022.