Festival Vocallis iert Harry Bordon

Bekans ederein kint “Wie sjoeën ós Limburg is” wel mètzinge meh väöl minder lui zien bekind mèt de sjrijver en zenger vaan dat alternatief Limburgs volksleed. Dat leed is gemaak en gezoonge door Harry Bordon, dee oet Venlo kaom meh daonao lang in Geleen heet gewoend en ouch in Amsterdam.

Festival Vocallis, e jaorleks Limburgs meziekfestival boebij veural de vocale meziek centraal steit, wèlt Harry Bordon oet de vergetelheid trèkke en deit dat mèt e program boe-in zien bekinde en minder bekinde leedsjes gespäöld weure door ’n elite-gezèlsjap vaan Limburgse troubadours, bestaonde oet Ivo Rosbeek, Linda Zijlmans, Linda Koolen en Harold K. En tössedoor zal Henk Hover, bekind vaan de regionale radio en tèllevisie ’t levesverhaol vaan Harry Bordon vertèlle.

Dao zien twie optrejjes gepland vaan dit bezunder conzèr en wel op:

• Zaoterdag 30 oktober 2021 in de Sint-Augustinuskerk, Prins de Lignestraat 33, in Geleen; dit conzèr begint um 14.00 oor.
• Zoondag 31 oktober 2021 in Theater de Garage, Saxenkampstraat 2, in Venlo en dit conzèr begint um 15.00 oor.

E fèlmke wat gemaak is tijdens ’n rippetitie kint geer alvas hei bekieke. Keertsjes koste € 17,00 euro en die kint geer bestèlle via de website vaan Festival Vocallis.