Hoes veur ’t Limburgs geit (eindelek) ope
’t Heet eve gedoord en de opening is versjèllende kiere oetgestèld meh noe is ’t daan toch zoewied: ‘t Hoes veur ’t Limburgs opent zien deure veur ederein dee geïntrèsseerd is in de Limburgse taol. En de hoesvesting maag ziech laote zien: in ’t gans opgeknapde Weerstandsgebouw in Remund, de febrik boe Philips jaorelaank elektrische weerstande maakde, heet ’t Hoes oonderdaak gevoonde, same mèt ’t Huis voor de Kunsten Limburg. Dao hèlt ’t Hoes vaan noe aof aon kentoer, dao zien de mètwèrkers te vinde en te bereike en dao is ruimte zat um bijeinkomste of vergaderinge te organisere.
Vaan harte welkom
De officieel opening vint plaots op vriedag 20 september vaanaof 16.00 oor, in ’t verlengde vaan de streektaolconferentie die daan dao gehawwe weurt. Ederein dee debij wèlt zien is vaan harte welkom. ’t Adres is De Weerstand, Bredeweg 10 in Remund. Geer moot uuch wel eve vaan te veure aonmelle, wat kint door dit formuleer in te völle. Lèt op: mèt dit formuleer kint geer uuch ouch veur de Streektaolconferentie insjrieve; daan kos dat € 15,- Meh es geer allein bij de opening vaan ’t Hoes veur ’t Limburgs wèlt zien, daan is dat gratis. Insjrieve gere veur 15 september.
Veer verstoon us
’t Hoes veur ’t Limburgs moot ’t expertisecentrum weure op ’t gebeed vaan de Limburgse taol. ’t Hoes zèt ziech in um de Limburgse taol sterker te make vaanoet de euvertuiging tot spreke vaan dialek good veur diech is. Zoetot de Limburgse taol ouch in de touwkoms op zoe väöl meugelek plaotse te hure en te zien is. En al weurt in Limburg um de zoe väöl kilometer ’n ander dialek gesproke, Veer verstoon us! ’t Hoes veur ’t Limburgs is ouch veur uuch!
’t Hoes veur ’t Limburgs is e gezamelek initiatief vaan de Limburgse taolorganisaties, boevaan Veldeke de groetste is. Veldeke zèt ziech in um vaan ’t Hoes e succes te make. Veer hawwe uuch op de huugde vaan de oontwikkelinge.
Mie wete?
Zeet geer geïntrèsseerd nao wat ’t Hoes veur ’t Limburgs is en deit? Of höb geer ’n vraog of ’n idee, bekiek daan ins de website vaan ’t Hoes en de campagne video hieronder:
