Hoes veur ’t Limburgs krijg zien eige plaots

De opriechting vaan ’t Hoes veur ’t Limburgs, e gezamelek initiatief vaan de Limburgse taolaorganisaties, geit weer e stepke korterbij koume es ’t Hoes same mèt ’t Huis voor de Kunsten Limburg zienen intrèk nump in ’t Weersand-gebouw in Remund. De planne zien tot de momenteel gaonde verbouwing vaan ’t gebouw in juni 2024 zoe wied gereid zal zien tot allebei de “hoezer” kinne verhuize. De officieel opening zal daan in ’t naojaor plaotsvinde.

Weerstandgebouw in Remund

’t Weerstandgebouw is gelege aon de Bredeweg 10 in Remund. De historie vaan ’t terrein geit trök tot ’t begin vaan de twintegste iew wie linneweveriij Elias ziech dao vestegde. In 1946 naom Philips de febrik euver en produceerde dao tot 2000 dynamo’s, weerstande en condensatore. Weerstand is noe erkind es industrieel erfgood. ’t Ligk in de bedoeling tot ’t terrein mèt respek veur ’t erfgood oetgreujt tot e compleet woen- en leefgebeed. Dao koume woeninge, dao is plaots veur greun, kleinsjaolege oondernummers en dao kump väöl ruimte boe lui ziech kinne treffe, veur oontspanning en cultuur.

Trefpunt veur taol, cultuur en erfgood

Mèt de verhuizing oonsteit ouch ’n tref- en vergaderpunt, evenes e nui adres veur provinciaol koepelorganisaties en platforms op ’t gebeed vaan erfgood en kunste, die door ’t Huis voor de Kunsten oondersteund weure. Ein vaan die organisaties is ’t Hoes veur ’t Limburgs,. Wat hei zien eige plaots zal kriege. Op de parterre kump me binne in ’n hiel touwgaankelek en liegdrempeleg trefpunt. ’n Plaots boe cultureel vrijwèllegers, makers en organisaties oet Limburg in en oet kinne loupe en terech kinne mèt vraoge.