Ierste Veldeke Ierepenning veur Lei Heijenrath

Tijdens ’t symposium ‘Bevordering en Verankering van de Limburgse taal’ op 12 jannewarie 2024 in ’t gouvernemintsgebouw in Mestreech heet Reg van Loo, veurzitter vaan Veldeke Limburg, d’n ierste Veldeke Ierepenning oetgereik aon Lei Heijenrath oet Kèrkraoj. In zien touwliechting prijsde Reg van Loo Lei Heijenrath veur zien groete verdeenste veur de Limburgse taol en ziene jaorelangen inzat veur ‘t behaajd, de bevordering en bestudering vaan ’t Limburgs.

Neet allein waor Lei 26 jaor viceveurzitter vaan Veldeke en is heer  al sedert 8 jaor viceveurzitter vaan de Raod veur ’t Limburgs, meh ouch waor heer deginnege dee ziech jaorelaank heet ingezat veur de professionalisering vaan ’t taolbeleid in Limburg en veur de totstandkouming vaan ’n instituut wat dao vörm en inhaajd aon kós geve. Mèt ’t Hoes veur ’t Limburgs heet dat instituut noe ouch ’t leech gezeen.

Ierepenning oontworpe door Leo Disch

De penning is oontworpe door Leo Disch, dee neve Benedictijner monnik in ´t Kloester vaan Mamelis, ouch kunsteneer is dee ziech touwlègk op werk in broons en hout. Bekind werk vaan Disch zien ’t Eurokunstwerk bij Chateau St. Gerlach, ’t boorsbeeld vaan Antoon Coolen in Deurne en de Bokkerijersplaquette in Valkeberg.

Veldeke kint al wel ’n ierelidmaostsjap meh dat is wie de naom al zeet veurbehawwe aon lede vaan Veldeke. Um ouch lui boete de ledekrink in ’t zunneke te kinne zètte is noe d’n ierepenning geïntroduceerd, al slut ’t lidmaostsjap de touwkinning ouch neet per se oet, zoewie ouch ’t geval waor mèt de touwkinning aon Lei Heijenrath.