Lidioom: Iezers veur glazer oug
De vurge waek leet ich eine windjvogel op: Veldeke zól ein rubriek kónne beginne mit nuuj Limburgse wäörd. Nag nieks van geheurd. Ich mót mich dus aafvraoge: höbbe veer die waal neudig, nuuj wäörd? Det ligk d’raan waat me wilt. En waat me nuuj wäörd neump. Veur ’t Nederlandjs moog me aannaeme: nuuj wäörd zien wäörd die nag neet in de waordebeuk sjtaon. Liek mich dudelik en mekkelik genóg. Mekkelik: det is binne de menuut nao te gaon, biej ’t Instituut voor Nederlandse Lexicologie. Amen. Nuuj Limburgse wäörd zólle ouch in ein waordebook mótte kómme.
Jaomer: veer höbbe gein algemein waordebook (wille make). Det vinj ich sjandalig, mae waem geit det nag get aan? Gein idee. Ich maak mich dao neet drök mie euver. Trök daoveur nao de vraog of veer nuuj wäörd neudig höbbe. Ich dink van neet. Waat haet me neudig um te kónne laeve: aete en get geldj. Aete kan me biej de voedselbank haole, geldj biej de leenbank, krek wie vreuger. Sjtaele geit ouch.
Veur wäörd guljt ‘tzelfde. Geweun pikke, mesjiens de klank efkes get aanpasse (klank höbbe v’r zat), enne…
Waat enne? Ich höb geine zin hiej wiejer op in te gaon. Hiel geweun: wilt ’t Limburgs zich ein taal neume, dan haet me behalve aafwiekende klanke en klinkers eine massa eige wäörd neudig. Höbbe v’r bao nieks aan gedaon. Woor verbaoje: neet weitesjappelik.
En noe? Waem wilt Limburgse wäörd verzinne veur al det grei det hiejhaer kump vanoet China en Amerika. Me kan neet taenge alles waat ós veurgezat waert dink zegke. En neet alle dinger die kómme höbbe nuuj name neudig. Hóngerde miense mómpele: ‘wo höb ich mienen tillefoon noe weer neergelag?’, en dan meine ze ’t mobielke. Ja zaet de vrouw dan: wens doe ouch dien sjpikkeleeriezer (bril) poter bös, waert ’t lestig. Det waord is mich dók gesjik in d’n tied det ich de Letterbak sjreef. Sjpikkelere (spieden), allei dan, mae det iezer d’rbiej? In ’t waordebook van Zitterd sjteit de variant ‘sjpikkeleieriezer’, mit es verklaoring: oogglas. Wie? Ein loep?
Reagere? redactie@veldeke.net of veldgewas@home.nl
Lidioom is eus wekelekse rubriek euver ‘t eigene vaan de Limburgse taol. Alle veurege aoflieveringen zien trök te vinde in eus arsjief.