LT2 cursus gestartj in Ech

Limburgs es twieëde taal

Väör kènjer en ouch volwassene, die oet ’n anger landj hie zeen kómme wèrke en wone, bestaon al ’n aantal jaore de kursusse NT2, waat stuitj väör: Nederlands es 2e taal. Op verzeuk van de Raod väör ’t Limburgs haet ‘ne wirkgroep zich noe ouch al rume tied bezig gehaoje  mit ’t óntwikkele van ‘ne kursus LT2, wobie ’t Limburgs de te lieëre twieëdje taal is. De Raod veultj dees verplichting vanoet de erkènning van het Limburgs es Europese taal.

Väör minse die Limburgs neet durve spraeke

Is det nuuedig? Limburgs kènne spraeke kan mit name interessant zeen väör minse oet anger streke van oos landj of oet ‘’t aangrenzendje boetelandj, die in oos provincie wèrke. En dao mit minse mótte ómgaon wobie zie dageliks ervare det ’t henjig zoe zeen zich in de communicatie mit Limburgers te kènne behelpe. Mer ouch väör minse die al lang in de provincie wone en mit Limburgers ómgaon, de taal good verstaon mer neet durve spraeke, kan deze cursus ’n good hulpmiddel zeen. Deze nuje kursus is dus gerichtj op Limburgs kalle en verstaon, neet ’t sjrieve en/of de spelling.

Ouch LT2 cursusse in Remunj en Mnestreech

In de regio van “’t Smaalste stökske” wore genóg aanmeljinge óm de kursus op 20 sept  in Ech te laote beginne. Door mitwèrking van de gemeinte Ech-Zöstere kan det in ’t Cultuurhoes aan de Plats. De kursus is neet oetsloetendj gerichtj op lokaal (Echs) dialek; ederein oet de omsjreve doelgroep en woonechtig of wirkzaam bönne ’t gebied tösse Zitterd en Remunj (en eventueel ouch daoboete) kan deilnumme. Op dit momènt zeen det 18 persoane. Docente die deze kursus gaeve zeen gerichtj op variaties, in wäörd en in oetspraok. ’t Is de bedoeling det begin 2024 ouch Lt2 cursusse aangebaoje waere in Remunj en Mestreech.