Nui dialekbook mèt kinderrijmkes

Op zaoterdag 9 november prizzenteert July Vijgen häör dialekbeukske veur kinder mèt es titel “Versjeskriebels” mèt 30 nui rijmkes euver oeteinloupende en aonsprekende oonderwerpe veur peuters en kleuters. De rijmkes weure oondersteund door illustraties vaan July zelf.

Twietaolegheid is good veur de oontwikkeling vaan eus Limburgse kinder. Die hölp bie ’t liere vaan ander vreempde taole. Kinder kinne beter verbande lègke, creatief dinke en twietaolegheid stimuleert ouch de communicatief capaciteite en daomèt ouch ’t aongoon vaan sociaol kontakte.

De Limburgse taol verbint

In 2019 teikende de Riekseuverheid en de Provincie Limburg ’t Convenant Limburgse taol um ’t Limburgs te behawwe en ’t gebruuk devaan te bevordere. Dit beukske gief gehuur aon dezen oproop en stimuleert ’t Limburgs dialek al op jonge leeftied. Joonk gelierd is jummers aajd gedoon.

’t Is e lösteg beukske wat neve de meugelekheiod um rijmkes veur te drage en op te zègke, ’t stimulere vaan de taoloontwikkeling, ouch aonzèt tot bewege, tèlle, herkinne vaan veurwerpe en oeteraard plezeer.

De prizzentatie vint plaots op 9 november um 15.00 oor in The Readshop, Nieuwstraat 12 in Hoensbroek. Ben van Melick, aajd docent Nederlands en columnis vaan gezèt de Limburger zal de middag aoftrappe mèt ’n interview mèt July. Daonao nump börgemeister Roel Wever ’t ierste beukske in oontvaangs.

’t Book is veur € 14,95 te koup bij The Readshop in Hoensbroek en bij bookhandel Van der Velden van Dam in Heerle, of via e mailke nao ward.vijgen@planet.nl.