“Sterre Straole” in Ech-Zöstere

De Veldeke Krink Ech organiseertj kómmende dónderdig, 26 oktoaber, same mit de heemkundevereniging Natuurvrienden Susteren weer ‘ne aovendj “Sterre Straole”, of in ’t Zösters: “Sjterre Sjtraole”. Väör de veerde kieër noe al, en det óm de twieë jaor. ’t Is ’n aovendjvöllendj programma mit meziek, zang en väördrach van en door lokaal artieste oet de gemèndje Echt-Susteren. Dudelik zal zeen det de Limburgse taal de baovetoan veurtj.

’t Idee is gebaore nao de fusie van de afzunjerlike gemèndjes Ech en Zöstere. Mit name ’t bestuur van de krink van Veldeke stèldje zich de vraog wie te operere in groter gewore gemèndje. Dao ouch leje gaon werve zoew es concurrendj ervare kènne waere door de dao bestaondje heemkundevereniging, die breid van opzèt woor en dialek ouch es aandachspuntj haw. Aan de beide väörzitters van dae tied is te danke det in good äöverlèk de samewèrking tót standj is gekómme, wo-oet in 2011 de ieëste aovendj “S(j)terre S(j)traole” is óntstange. Ouch op anger puntje höbbe de vereniginge ’n gooj verhaojing en wèrke soms same.

De ieëste aovendj “S(j)terre S(j)traole” woor dus in 2011 en de bedoeling woor ‘ne Limburgse aovendj te realisere mit lokaal artieste oet alle kerne van de nuuj gemèndje. Väöral ouch ’n podium te beje aan de boete hun eige dörp get minder bekèndje artieste. Daonaeve mós ’t geine vastelaoves-aovendj waere. Det streve is in de aafgeloupe jaore betrèkkelik good gelöktj. Hoewaal ’t soms meujlik is in de versjillende klein kerne deilnummers te vènje, is bie de aafgeloupe aovendje stieëds ’n breid scala van artieste op ’t podium gewaes, van bekèndj, tót minder bekèndj en verrassendj ónbekendje óntdèkkinge. Kort gezag: ’t wore geslaagdje aovendje.

Op 26 oktoaber 2017 volgtj noe de 4e aovendj. Mit dialek-väördrachte door Annie Schreuders-Derks en Toos Hoeben en door Isa Meuwissen, de Limburgs kampioen van de Veldeke declamatiewedstried. Meziek door Audrey Janssen (zang), Jules Peters (leedjes van Piet en Evert Zits) en Rick Heijnen (trompet). Begeleiding Ad Gijzels en Jo Huynen. Spic en Span, bekèndj van de vastelaovesleedjes, zeen d’r ouch mer noe mit gans anger repertoire. En den is d’r ’n sketch door Ria Hausmans en Stef van Ool. “S(j)terre S(j)traole-4” begintj op 26 oktoaber óm 20.00 oer (zaal aope 19.30) in de Hermeniezaal aan de Feurthstraot in Zöstere. Entree 5 euro. Ederein, lid of neet lid, is van herte welkom!