Streektaolconferentie 2024 in Remund

De jaorlekse nationaol streektaolconferentie vint dit jaor plaots in Remund. Op vriedag 20 september aonstaond koume streektaolfunctionarisse en –geïntrèsseerde oet gans ’t land vaanaof 9.30 oor bijein op ’n bezunder locatie, naomelek in ’t nog officieel te opene oonderkoume vaan ’t Hoes veur ’t Limburgs in ’t Weerstandsgebouw aon de Bredeweg 10 in Remund. De officieel opening vaan ’t Hoes veur ’t Limburgs steit aonsletend aon de conferentie um 16.00 oor in de middag op d’n agenda.

Dialek op sjoot en sjool

’t Thema vaan de streektaolconferentie is Dialek op sjoot én sjool, over meertalige opvoeding én educatie. Tijdens de ochtendsessie zien dao sprekers vaan de universiteit vaan Gent euver mietaolegheid in ’t middelbaar oonderwies en van de Akademia Papiamentu euver de erkinning vaan ’t Papiaments es regionaol taol. Die weure gevolg door deilsessies boe-oet de bezeukers ’n käös kinne make. ’s Middags sprik Dyanne Sleijpen veur de plenaire zaol met es titel Dy-andere boenao weer ’n käös gemaak kint weure oet versjèllende deilsessies. Es aofsleting vaan de conferentie vint daonao roond 16.00 oor de officieel opening vaan ’t Hoes veur ’t Limburgs plaots.

Insjrijving

Zoewel de conferentie es de opening zien apaart es in combinatie bij te woene in De Weerstand in Remund. Op dees historische industrieel erfgoodlocatie kump ’t Hoes terech in ’n broesjende umgeving. Mèt deze fysieke thoesbasis, centraol gelege in de provincie, oontsteit ’n tref-, inspiratie- en vergaderplaots veur vrijwèllegers, makers, organisaties en geïntrèsseerde die ziech mèt de taol bezeg hawwe. ’t Is ’n uniek en bezunder momint veur ’t Limburgs, wat geer neet wèlt misse! Deilnaome aon de conferentie kos € 15,00 boebij ‘ne lunch is inbegrepe. Insjrijving en betaoling vaan dat bedraag deent veur 13 september te gebäöre. Deilnaome aon allein de opening vaan ’t Hoes is gratis. Veur insjrijving en käös oet ’t program kint geer terech op de website vaan ’t Hoes veur ’t Limburgs door hei te klikke.