Taolkelender vaan ’t Mestreechs obbenuits oetgebrach

In 2018 brach taolkundege Flor Aarts d’n ierste ‘Taolkelender vaan ’t Mestreechs’ oet en in 2020 volgde de  ‘Nuien Taolkelender’. Flor Aarts is in juli 2021 gestorve meh noe zörg zien dochter Wien Aarts deveur tot de serie weurt wijergezat. Begin oktober heet zie ‘t ierste exemplaar vaan de vernuide oetgaof aongebooje aon börgemeister Wim Hillenaar. Wien voogde ouch ’n aontal foto’s touw vaan plaotse in Mestreech die veur häöre pa belaankriek waore.

Wijer beejt d’n Taolkelender nog ummertouw veur ederen daag vaan ’t jaor weetsjes en räödselkes euver ‘t Mestreechs zoewie:

• Wat beteikene de volgende oetdrökkinge?
  • ’n Striep inhöbbe
  • Lek m’n tes
• Oet  welke taole koume de volgende Mestreechse wäörd?
  • Besjuut
  • Huif
• Vertaol in ’t Mestreechs:
  • Ze kwam thuis met een tas vol boodschappen.

En ’t antwoord op al die 365 vraoge is ederskier  trök te vinde op d’n achterkant vaan deen daag. D’n Taokelender is ieweg bruukbaar umtot wel de daotums zien geneump meh neet de daog die in e bepaold jaor daomèt euvereinkoume.

De ganse opbrings vaan dees oetgaof kump tegood aon ‘t Jonge Brein Onderzoekfonds oet Mestreech, wat ziech inzèt veur oonderzeuk nao kinder mèt psychische klachte.

De kelender is gedrök in ’n oplaag vaan 1.500 stöks en is zoe lang de veurraod strek veur € 18,95 te bestèlle via www.taalkalender2024.nl.