TV Debat euver de touwkoms vaan de Limburgse taol

In ’t L1-program Aovendgaste vaan maondag 4 november weurt ’n debat oetgesjik euver de touwkoms vaan de Limburgse taol. De deilnummers zien vaanoet versjèllende invalsheuk bij dat oonderwerp betrokke, vaan dialekmuzikante en oonderwiesgevende, tot media en streektaolorganisaties. En Veldeke liet netuurlek ouch vaan ziech hure.

’t Debat is ieder opgenome op 22 oktober in Venlo. Aonleiing is de koumende oonderteikening vaan ’t convenenant door de regering en de provincie euver de erkinning vaan ’t Limburgs es streektaol. Oonder bezielende leiing vaan Frans Pollux discussiëre de deilnummers aon de hand vaan stèllinge euver ‘t gebruuk en de mieweerde vaan de Limburgse taol.

De oetzending is te bekieke op maondag 4 november vaanaof 20.30 oor en weurt herhaold op goonsdag 6 november (20.30 oor) en op zoondag 10 november (13.00 oor). Allemaol op L1-tèllevisie.

Geer kint ‘t debat ouch nog ins bekieke en beluustere op de website vaan L1 TV.