Veldeke hölp mèt bij de Theatershows vaan John Tana

Sandy Muijlkens, bestuurslid vaan Veldeke Limburg. waor aonwezeg bij de theatershows vaan John Tana in Mestreech. Ze deit hei verslaag vaan wat ze allemaol mèt maakde.

In ’t weekend vaan 21 tot en mèt 23 juni waor ’t eindelek zoe wied: de theatershows vaan John Tana aon ’t Theater aan het Vrijthof voonte plaots. Tijdens dees theatershows kaome ouch de dialekworkshops vaan pas die John Tana, same mèt Veldeke Limburg, had georganiseerd op 3 basissjaole en 1 middelbaar sjaol in Mestreech. Zelf bin iech naomens Veldeke bij al dees dialekworkshops aonwezeg gewees es coach. De dialekworkshops waore e groet succes en iech voont ’t super leuk um te zien wie enthousias en creatief de kinder aon de slaag gónge mèt de opdrach vaan de dialekworkshops: zelf á la John Tana ‘nen dialekteks make op ’t Frans nómmer Les Copains D’abord vaan Georges Brassens

Vaan de door de kinder bedachte dialektekste heet John Tana éine nómmer gemaak. Deze nómmer mochte de kinder, vaan wee d’n teks in de nömmer terech waor gekoume, same mèt John Tana zelf zinge tijdens de theatershows. Iech bin bij de theatershows op zaoterdag en zoondag aonwezeg gewees um de kinder te begeleie, veuraofgaond, tijdens en nao hun optrejje.

Bij oontvaangs in ’t Theater aan het Vrijthof kraoge de kinder ’n roondleiing, zoewel door d’n theater es backstage. Dit voonte de kinder al hiel bezunder, umtot de mieste hei nog noets waore gewees. Veur hun waor ’n eige kleidkamer geregeld en veur alle kinder laog ouch ‘nen echte John Tana zonnebrèl gereid. Veuraofgaond aon de show voont nog ’n generaol rippetitie plaots en daonao waor ’t wachte tot de show begós. De kinder kóste de show backstage volge en oongevier haafweegs de show waor ’t veur hun showtime. Naotot ‘ne video waor getoend mèt beeldmateriaol vaan de dialekworkshops, reep John Tana hun op de buun um same hun eige gesjreve dialekteks te zinge. De kinder genote hei ziechbaar vaan, zónge oet volle boors mèt en kraoge nao aofloup ’n hel applaus vaan ’t publiek. Iech voont ’t hiel bezunder um te zien wie enthousias de kinder waore, wie ze, oondaanks tot sommege ’t toch wel erg spanneteg voonte, allemaol oet volle boors mètzónge en ouch um te zien wie ’t publiek reageerde op dit optrejje.

Op ’t eind vaan de show mochte de kinder nog ‘ne kier de buun op, same mèt alle ander gaste en artieste, en nao aofloup vaan de show woorte nog foto’s gemaak mèt John Tana en handteikeninge oetgedeild. ’t Waor e super geslaag weekend, boe-in de Limburgse taol op ’n bezunder meneer oonder d’n aondach woort gebrach. De kinder kraoge bij ’t nao hoes goon nog ‘nen echte ‘goodiebag’ mèt dao-in e Mestreechs leesplekske en e Limburgs stripbook of Limburgs kwartètspeul. De goodiebag had iech samegestèld mèt hölp en sponsoring vaan de Veldeke Krink Mestreech.

Al mèt al waore de theatershows de keers op de toert vaan de aofgeloupe maonde boe-in Veldeke Limburg same mèt John Tana de Limburgse taol oonder de aondach heet gebrach vaan jong lui in Mestreech. Binnekort weurt geëvalueerd of dit projek e vervolg kint kriege op ander plaotse in Limburg.

Sandy Muijlkens, bstuurslid Veldeke Limburg

(Foto’s Beaucoup Marketing / Mosasaurus Film Productions)