Veldeke Jaorbook 2021 geprizzenteerd

Op goonsdag 18 mei 2022 is ’t Jaorbook vaan Veldeke Limburg geprizzenteerd tijdens ’n bijeinkoms in de Kopermolen in Vaols. De nuie Veldeke veurzitter Reg van Loo opende en sloot der bijeinkoms mèt de verzekering tot Veldeke alles draon zal doen um op provinciaol en lokaal nivo de Limburgse taol in iere te hawwe. Vocaol ensemble De Wiefkes verzörgde muzikaol intermezzo’s in oonvervals Mechels plat. Redactielid Peter Kleijn euverhandegde ’t ierste exemplaar aon Jo Kern vaan de Veldeke Krink Um Mamelis dee es gashier vaan de bijeinkoms optraoj. ’t Jaorbook bevat wie gebrukelek ’n groete variëteit aon artikele euver zoewel taolkundege es volkscultureel thema’s.

Limburgse vogelnaome

Guus Urlings, bekind vaan zien wekelekse columns euver flora en fauna in de Limburger, sjreef ‘n oetgebreid verhaol euver de Limburgse benaominge vaan veugel en de grote versjèlle die daobij kinne optrejje tösse de dialekte. Taolkundege bijdrage zien dao vaan Peter Klein euver de miervoudsvörm in de dialekte vaan Vaols en umstreke (Muizen, muus en Mäuse) en vaan veurmaoleg streektaolfunctionaris Pierre Bakkes euver de persoensoetgeng in ’t Mofers. Gerrit Bloothooft sjreef e verhaol euver ’t verdwijne vaan Limburgse veurnaome. Wijer bevat ’t Jaorbook artikele euver de speciaol taole vaan de Eijsdense mijnwèrkers vaan Nantke Pecht en euver de vaktaol van mijnwèrkers in historisch perpectief vaan Ton van de Wijngaard.

Limburgs in ‘t oonderwies

De discussie euver ’t gebruuk vaan Limburgs in ’t oonderwies en ’t al daan neet opveuje vaan kinder in ’t plat kump aon de orde in artikele vaan Lieke Huisman en Lotte van Loo en Ilse Keulers. Yvonne de Vries behandelt de stadspercessie vaan Remund en wie die oontstande is es gevolg vaan de groete stadsbrand in 1665, dee Remund compleet in d’n as lag. Lou Spronck liet zie leech sjijne euver ’t belaank vaan ’t gesjreve Limburgs nao aonleiing vaan ’t versjijne vaan de ierste deilkes vaan de Nachtegaalreeks. Wijer bevat ’t Jaorbook nog ’n aontal bookrecensies en beriechte vaan de Veldekekring en vaan Veldeke Limburg. Genóg um vaan te genete veur wee geïntrèsseerd is in de Limburgse taol en cultuur.

Lede vaan Veldeke kriege ’t Jaorbook touwgesjik, nao wins in drök of digitaol. Veur neet-lede is ’t Jaorbook te koup veur de pries vaan € 20,- (excusief versjikkoste) via de winkel op deze website.