Veldeke Kringe Kóntak Daag 2024 in Venlo

In september 2023 óntving de Dialekvereiniging Veldeke Venlo in Venraoj de vlag van Veldeke Limburg as teiken det zeej in 2024 de Kringe Kóntak Daag mogte organisere. In jannewari 2024 woort d’r op verzeuk van ’t bestuur van Veldeke Venlo eine werkgroep geformeerd dae dezen daag meus organisere. Deze werkgroep bestónd oet Lei Fransman (veurzitter), Gerard Derkx (sikkertaris), Pieter Ebus (penningfoekser), Willem Menge (PR), Jos Verbong (akkomodasies Op Steyl) en Wiel van Aarssen (kontaktpersoeën bestuur Veldeke Venlo).

‘t Schötteriemuseum in Steyl

Al gauw woort beslaote det de KKD 2024 op Steyl zoel waere gehalde. Dit umdet dao verschillende interessante bezeenswaerdighede vlak beej mekaar loge. ‘t Programma woort in mekaar gedreid en oetgewerk. Spónsore woorte gevónde veur ’t aafscheidskedo. Weej krege zellefs van ein verzekeringsmaatschappij ein stök euver Steyl in hand. Det hebbe weej vertaald nao ’t Venloos. En eine manager van die maatschappij haet ós nog geholpe um ’t stök good te vertale.

‘t Schötteriemuseum woort as oetgangspunt gekaoze. Dao begóste weej op zaoterdaagmorge met de óntvangs van de deilnemers. Beej binnekóms krege de deilnemers kóffie of thee aangebaoje. Daonao kwame de bruuedjes met ein tas soep. Jaomergenóg maar in totaal 37 persoeëne. Wao ónder ózze wethalder van Cultuur (mevrouw Mary Pollux) en ózze gedeputeerde veur Cultuur (dhr. Jasper Kuntzelaers).

Mevrouw Pollux kreeg na eur äöpeningswaort ein boeket blome aangebaoje. D’n hier Jasper Kuntzelaers noom ós mei op de reis nao Friesland. Dao hebbe zeej kinnis gemak met de waeg dae weej mótte bewandele um ouk ein erkinde taal conform ’t Europees Handvest Deel III te waere. Veur zien wäört kreeg hae ein fleske “Grand Prestige” aangebaoje. Daonao woort de groep in 2 subgroepe verdeilt. Eine groep ging nao ’t Kaetelhoes en de andere groep kreeg ein róndleiding in ’t Schötterie-museum. Nao óngevier 1 oor woorte de groepe gewisseld.

Rónd 15:30 oor kwame weej weer beejein in ’t museum. Dao begós ’t gezellig samezien ónder ’t genot van ein glaeske. Tössedoor traoj Ton Engels op met gezónge Limburgse leedjes. Ouk traoje 2 kinder op met eur deklamasie. De kinder krege veur eur optraeje inkele kedootjes. ‘t Werm en kalt buffet veel beej idderein in de goje smaak.

Aan ’t ind van d’n daag kreeg d’n hier Reg Van Loo, veurzitter van Veldeke Limburg ’t waort. Hae woort gevraog de vlag van Veldeke Limburg offisieel euver te drage aan de Kring Ech. Zeej meuge de Kringe Kóntak Daag 2025 organisere. Zeej makde d’n daag al bekind. Op zaoterdaag 13 september 2025 treffe weej ós weer, maar dan in Ech. De órganisatore danke alle deilnemers en vreejwilligers veur eur beejdrage aan ’t sukses van dezen daag.

Gerard Derkx, Venlo