Veldeke Oeuvre-Pries 2024 veur Minsekinder
Iervol oondersjeiing veur Venloos mies tropische dialekband
De Venlose formatie Minsekinder oontvingk dit jaor de Veldeke Oeuvrepries vaan ’t Limburgse Leed. De gróp, dee al sind de jaore tachteg actief is, weurt mèt de pries geïerd veur hun umvaankriek oeuvre en hun verdeenste veur ’t Limburgse leed. Bas Vissers vaan Veldeke Limburg maakde ’t nuits bekind in ’t L1-Radio program Plat-Eweg vaan Henk Hover, in ’t bijzien vaan Minsekinder froontmaan Michiel van der Grinten. De band oontvingk de pries officieel op zaoterdag 21 september tijdens de Nach van ’t Limburgse Leed in de Venlose binnestad.
Veldeke Bestuurslid Bas Vissers (r) feliciteert Michiel van der Grinten
vaan Minsekinder mèt ziene pries (Foto Henk Hover)
Mèt Minsekinder geit – nao De Drekskaters veureg jaor – de Veldeke Oeuvrepries obbenuits nao ‘ne band oet ‘’t stedje van lol en plezeer’. ’t Verhaol vaan ‘Venloos mies tropische dialekband’ start in 1989. Michiel van der Grinten is op dat momint zjus trök vaan e verblief in Mexico en nao zien periood mèt ’t dialekprojek ‘Mooder Hellup’ is ’t tied veur get nuits: ‘ne band dee in ’t dialek geit zinge. Minsekinder is gebore en de keersveerse gróp maak al gaw naom. En dat neet in de lèste plaots door de ras-performer René Scheffer, dee de ierste 10 jaor froontmaan is. Minsekinder geit wijer boe ‘Mooder Hellup’ gestop is: mèt ’t bringe vaan swingende, eigentijdse versies vaan aw Venlose vastelaovendsnómmers. In 1994 nump de gróp ’n legendarish gewore livge-album op in De locomotief. Ouch oontsteit mie en mie eige werk.
Nui periood
Roond de millenniumwisseling stop René Scheffer, vaanaof dat momint is Michiel van der Grinten de zenger. De nui periood weurt ingelojd mèt ’t album ‘Nieje Veere’. De ander bandlede zien daan Jaakko Buchholtz, Jeroen van de Linden, Geert Hermkes, René Kaufmann en later Stefan Nijssen. Ouch oontsteit ’n intensief samewèrking mèt ‘nestor’ Sjraar Peetjens: d’n awwe vastelaovendszenger beleef ’n twiede en zelfs derde jäög mèt daank aan de väöl optrejjes die heer mèt zien vrun vaan Minsekinder heet.
De band blijf oondertösse doorgoon mèt boe hun krach ligk: ’t bringe vaan swingende en dansbaar meziek, mèt wortels vaanoet alle windstreke. De Vereinegde Staote, Latiens-Amerika, Afrika: de Minsekinder-klaanke koume euveral vaandan.In dat kader is ’t neet vreemp tot de gróp in 2004 ’n muzikaol reis nao Nigeria maak, ’n abseluut hoegtepunt in de historie vaan de band. ’n Deeptepunt is in later jaore ’t sterve vaan bandlid René Kaufmann, dee ouch verantwoordelek is veur väöl vaan de tekste, boe-oonder de klassieker ‘Vraog mien hert’. Op zier respectabele leeftied störf in 2019 ouch Sjraar Peetjens.
Dans Marietje
Nog altied is Minsekinder, wat klassiekers wie ’t Sint Juttemis-leed en Dans Marietje op hunne naom heet stoon, hartstikke actief, mèt door de jaore de nudege albums, de jaorlekse Limboot-optrejjes en oonlaanks nog ’n live-zjubeleiplaat in de Gouden Tijger. De band, dee ’n vaste weerde is tijdens de Nach van ’t Limburgse Leed, zit mèt häör zomerse klaanke nog vol energie en ambitie en is dus nog lang neet vaan plan demèt op te hawwe. D’n Oeuvrepreis maag daan ouch gezeen weure es ‘ne stimulans um veural door te blieve goon. Op YouTube zien genóg fèlmkes vaan Minsekinder te vinde, oonder mie deze vaan ‘Dans Marietje’
Juryrapport
Es geer ‘t rapport wèlt leze mèt de motivatie vaan de jury um de Veldeke Oeuvrepries dit jaor aon Minsekinder oet te reike, daan hoof geer mer hei te klikke.
Oeuvrepries veur d’n achtiende kier oetgereik
De Veldeke Oeuvrepries van ’t Limburgse Leed weurt veur d’n achtiende kier oetgereik. Tot verleie jaor zörgde Veldeke Venlo veur de pries, vaanoaf dit jaor is Veldeke Limburg daoveur verantwoordelek. Vaanaof ’t ierste begin besteit ’n bezunder samewèrking tösse Veldeke en de Nach van ’t Limburgse Leed: de oondersjeiing weurt altied op of roontelum ’t festival oetgereik. Dat is ouch deze kier ’t geval. Op zaoterdag 21 september weurt de band vaanaof 18.30 oor gehöldeg in de bibliotheek aon de Begijnengang 2, um 20.00 oor trejt Minsekinder op op ’t hoofpodium op de merret vaan Venlo en weurt de pries oetgereik. Later tijdens de Nach gief de band vaanaof 00.30 oor ‘n ‘after party’ in De Blauw Trap. Zoewel de bijeinkoms in de bibliotheek es de optrejjes zien vrij touwgaankelek, zjus wie alle ander optrejjes tijdens de Nach van ’t Limburgse Leed.
De pries geit eder jaor nao ‘ne persoen of ‘ne gróp mèt jaorelang verdeenste veur de Limburgse dialekmeziek in en boete de provincie. De winner krijg e kunswerk gemaak door Mariëlle Franssen en ’n oerkónde. Ieder winners vaan de Veldeke Oeuvre-Priés zijn: 2023 De Drekskaters 2022 John Coenen 2021 Ton Engels 2020 Arno Adams 2019 Neutjesrang (Paul Nagelmaeker †) 2018 Gé Reinders 2017 Henk Steijvers 2016 Thei & Marij 2015 Jack Vinders 2014 Um en Um 2013 Guus Smeets † 2012 Nol Wassen † 2011 Ben Verdellen 2010 Sjef Diederen † 2009 Wooden Chain 2008 Hannelore Winter 2007 Jan Theelen † .