(Zösters)

Limburg is ein provincie vol tradities. En zoa wie zich det geheuërt geuf ’t dao ouch väöl vereiniginge en organisaties die zich mit die tradities óm gang hawte. Door dao actief invölling aan te gaeve ofwaal óm dao sjtudies nao te doon. Het doel van Veldeke is van oarsjpróng ’t laevend hawte van de Limburgse taal en volkscultuur. De grens tösje taal en cultuur is neet aan te gaeve, de interesse hunk dus altied same. Vanaaf 2005 haet Veldeke ein commissie die zich specifiek op de volkscultuur rich.

De volkskunde is de cultuur van ’t aldaagslaeve, zie haet de naam zich veural op vreuger te richte en daovan dökker ein väöl te romantisch ideaalbeeld te sjildere. Veldeke bekik zich de volkscultuur es ein versjiensel det permanent in óntwikkeling is. Wie belangriek ’t ouch kan zeen de culturele gebroeke en geweuëntes van vreuger te beware, minstes aeve zoa wichtig is ’t te bekieke wie de dageliks laeve allewiele d’r oet zuut en wie men die kan besjrieve en besjtudere. De taal van internet is mit anger weurd, van aeve groat cultureel belang es de sages en legendes die ós veurawwers höbbe euvergeleverd.

Veldeke haet in ’t bezunjer aandach veur de taalkantj van de volkscultuur. Dus veur de tekste van leedjes, van recepte, van vastelaovend, van religieuze rituele, van sjpreuke en gezègkdes en waat ’t al neet geuf. Veur de res verwieze weer vanoet de website gaer nao alle angere instanties die zich mit volkscultuur óm gang hawte en womit Veldeke op allerlei menere samewirk, zoa wie vereiniginge die zich toelègke op heemkunde, vastelaovend, folklore, sjötterieje, harmonieje, toneel en al waat weer kènne op volkscultureel terrein.