Wat is ’t Hoes veur ’t Limburgs?
Veer kriege noe en daan vraoge wie: Wat is ’t Hoes veur ’t Limburgs noe eigelek? En: Is ’t Hoes veur ’t Limburgs ’t zelfde es Veldeke? Nein, ’t Hoes is neet ’t zelfde es Veldeke. ’t Hoes is e samewèrkingsverband boe-in ziech 7 organisaties die ziech inzètte veur de Limburgse taol vereineg höbbe um ’t Limburgs te behawwe en te bevordere veur de touwkoms. Dat gebäört mèt steun vaan de Provincie Limburg, die ’t Hoes veurzuut vaan de nudege financieel middele. Zoe kinne binne ’t Hoes vaste mètwèrkers weure aongestèld die de taolaorganisaties, die mierendeils oet vrijwèllegers bestoon, professioneel oondersteune.
Krachte geboondeld
Vaanoet ’t Hoes kinne zoe op ’n gecoördineerde meneer de krachte vaan de deilnummende taolorganisaties geboondeld weure. Veldeke deit dus wel mèt in ’t Hoes veur ’t Limburgs, meh blijf daoneve ouch häör eige activiteite en communicatie oetveure, zjus wie dat noe ’t geval is. Dat gelt in ’t bezunder veur alles wat Veldeke op lokaal nivo met de 10 Veldeke Kring organiseert. Dao zal eigelek niks in verandere. Wat binne ’t Hoes gecoördineerd weurt zien mèt naome activiteite die op provinciaol nivo speule, beveurbeeld es ’t drum geit wie de Limburgse taol geprizzenteerd werd nao de polletiek, nao de media en nao ander maotsjappeleke instèllinge. Daobij zalle de deilnummers in ’t Hoes mie gezamelek goon optrejje.
Samewèrking mèt ander taolorganisaties in Limburg
Veldeke wèrk in ’t Hoes dus same mèt zès ander taolorganisaties en dat zien: de Limbörgse Academie, Levende Talen Limburgs, de Vereniging voor Limburgse Dialect- en naamkunde (VLDN), MIK Kinderopvang, De Willy Dols Stichting en de Raod veur ’t Limburgs. Bij gelegenheid vaan de opening vaan ’t Hoes is ’n aontal fèlmkes gemaak boe-in alle deilnummers ziech kort veurstèlle. Geer kint die fèlmkes hei bekieke. Daobij deent aongeteikend tot de Raod veur ‘t Limburgs wel betrokke is bij de Stuurgróp dee de inriechting vaan ’t Hoes veurbereit, meh gein deil zal oetmake vaan e coöperatie die dao oet veurtkump umtot ze hunnen staotaus es oonaofhaankelek adviseur vaan de provincie wèlle behawwe.
Veldeke blijf de vereineging die ‘t noe is
’t Hoes is dus neet ’t zelfde es Veldeke. Veldeke blijf dezelfde vereineging die ’t noe is. Allein zalle veer binne ’t Hoes e beroop kinne doen op professioneel oondersteuning en beter goon samewèrke mèt ander taolorganisaties um zoe ’n sterker voes kinne make bij ’t bevordere en besjerme vaan de Limburgse taol. Veldeke is wel de groetsten deilnummer aon ’t Hoes en ouch de vereineging die de mieste binding heet met de versjèllende regio’s en dus ouch mèt de versjèllende dialekte binne eus provincie. Dat gief us ’n bezunder verantwoordelekheid um ‘t Hoes veur ’t Limburgs tot e succes te make. Dao goon veer eus bès veur doen.