Welkom bij Veldgewas
Op deze pagina vint geer altied de lèste nómmer vaan Veldgewas zoegaw dee is oetgekoume. Veur ‘n euverziech ieder gepubliceerde nómmers kint geer terech in ‘t Veldgewas arsjief. Veldgewas is e blaad veur en euver de Limburgse taol. Veer publicere online gediechte en verhaole in versjèllende Limburgse dialekte. Veldgewas besteit al 13 jaor meh versjijnt vaanaof september 2023 mèt ‘ne nuie start en in ‘ne nuie vörm.
Veldgewas september 2024
- Veur Veldgewas es PDF bestand kint geer hei klikke.
- Es geer E-reader software höb geïnstalleerd kint geer Veldgewas ouch es tiedsjrif downloade. Klik daan hei.
Es geer op de huugde wèlt weure gehawwe vaan wienie weer ‘ne nuie nómmer vaan Veldgewas versjijnt, daan kint geer uuch (gratis) abonnere door e mailke te sjikke nao veldgewas@veldeke.net mèt de vermelling “abonnemint”.
Es geer mie wèlt wete euver wat Veldgewas veur uuch kint beteikene, daan klik geer hei veur e beriech aon de lezers.
Sjik eur gediechte in Nao Veldgewas
Veldgewas nudeg ederein dee in de Limburgse taol sjrijf of wèlt liere sjrieve oet gediechte en verhaole op te sjikke nao veldgewas@veldeke.net.
De redactie zal alles wat geer insjik mèt plezeer bekieke en beoordeile of ’t gesjik is veur publicatie in eus online magazine. Es criteria gelle daobij veural: oersprunkelekheid, creatief taolgebruuk en beleving. Es geer dao pries op stèlt wèlle veer uuch gere advies geve euver wie ‘nen teks eventueel verbeterd kint weure. Meh of geer uuch dao get vaan aontrèk maag geer gans zelf wete.
Spelling is neet ‘t belaankriekste
Geer hoof ouch neet bang te zien tot veer al te kritisch zien op de spelling vaan de Limburgse taol. Veer wèlle uuch gere informere euver de veurkäörspelling die Veldeke al in 2002 heet opgestèld. Meh es geer op eur eige meneer wèlt spelle, is dat ouch good. ’t Belaankriekste is tot in de Limburgse taol gesjreve weurt.
En dink noe neet te gaw: dat is niks veur miech. Veer meine te wete tot väöl lui in Limburg gediechte en verhaole wèlle sjrieve, ouch dèks in de taol vaan hun stad of dörp. Meh neet ederein heet de mood um die te publicere. Veer beeje uuch e liegdörpeleg podium um dao ‘ne komaof aon te make. Perbeer ’t ins, geer maag zoewiezoe altied ’n reactie vaan us verwachte.
Es geer mie wèlt wete euver wat Veldgewas veur uuch es sjrijver vaan Limburgstaolege tekste kint beteikene, daan klik geer hei veur e beriech aon de sjrijvers.
Kiek ins in ‘t arsjief vaan Veldgewas
En es geer verlege zit um inspiratie: kiek in in ’t Arjsief (De Moenik) nao wat Veldgewas in de aofgeloupe 12 jaor zoe-al gepubliceerd heet. Of scroll ins nao oonder op deze pagina veur get veurbeelde oet dat arsjief te vinde.
Veer zien eur gediechte en verhaole gere tegemoot!
Misse
Stilstaondj op ’t strandj
zeen ich de wie zieë
en dink aan dich
guns
aan de uueverkantj.
Veuldje ich in mien handj
mer ein traon oet dien ouge
van leefdje of verdreet
of
heel ich dich mer vas
aan ein vaemke van diene jas.
Det waas mich lever
es hie die ganse zieë.
’t Is mer vuuer ’n jaor of twieë,
zags se.
In de gaard bluje de blome
en de kese zeen al riep,
ich wil d’r dich waal gaeve
mer mien handj reiktj
neet zoea wied.
Har Sniekers, Thorn
December 2021
In de morge van dien sjtraote
zeuke miense häör gelök
klinke klanke oet Sjtufs tore
reurt de Roer róndj Sjteinebrök
Wiermelsjtad – halfgesjaore
aad en nuuj sjteit naevenein
door winkelrame aope deure
prónks doe mit ’t Munsterplein
Zoväöl oere sjoere dien moere
sjraaps se ouge blikke biejein
leuts dich veule-preuve-beloere
dien hert det klop in edere sjtein
Els Zeegers-Koelen, Roermond
April 2021
stil laeve
vreug-nao-bèd
pak verkieërdj oet
klaor wakker
vaem ich al waat mót
aan ’ne kitting
óm miene nak
boete is ’t stil
in miene kop roesjt
de daag veurbie
– ouge toe! –
lang genóg
nao de gerdiene gekeke
akelig stil is ‘t boete
altied is waal get
‘ne hónd, ‘ne uul,
‘ne late fietser
‘ne vreuge auto
mer noe is ‘t ram stil
de stiltje doertj wiejer…
en wiejer … en wiejer…
geuf mich pas rös
es ich snap
det de aovendjklok
‘t laeve haet mitgenómme
Marleen Schmitz, Montfort
Januari 2021
jannewari-dip
jannewari knotert
is neet kóntent
de zón noe ouch
corona-patiënt?
alles vaal en gries
nieks vrolijks in-gelies
pratsj, sjliek en toter
jannewari-geknoter
ofwen alles op de bón
toch lichskes ane horizon
qua gemood inne pöt
mer…de kanarie flöt
wat meer es troos?
sjtrakkes: moeremoos
Toos, Vlodrop
Januari 2021
Sjtil sjtraot
de sjtraot is sjtil
d’r wurt al daag neet mae gelache
zie zjwiegt, ich mis kal
’t geklatsjeneer mit de naoberluuj
ich zeen en heur ze neet
ich mis de kènjer die hinkele
en harte kriete oppe sjtoeptegels
d’r is gein teike van laeve
in ’t haofke van de Thaise naobervrouw
is de boum geheiligd
mit bóntje crêpepepiere sjlierte
die sjméke óm gezóndjheid en gelök
’n benaw lóch
haet zich oetgesjpreijd euver de tarlaog
kratst gate in ederein
in al wat nog laeft
de bel geit, ‘ne léve haet ’n mangel
vol waar aan ós deur gezat
de bel geit, de baoje van d’n apotheek
zet ós de medecien veur ’t griepe
v’r wachte es e gans landj
op baeter daag
Jack Jacobs, Elsloo
April 2020
Vier haode ós allemoal jet ater de hank,
Ejalieg wat vuur roadsjleëg ze óch jeëve,
’t rejeert nit ummer ós nutter versjtank,
En ós jeveul is döks uvverdreëve.
Mar kiek ins bij diech óp d’r jank,
Blief bij jinne tse lang kleëve,
Hod in jodsnaam jouwe aafsjtank,
En deel wat ze has um tse uvverleëve.
Angs is vuur jinne inne jouwe kammeraad,
Hod vuur alles doch nog jouwe mód,
’t sjiengt e lempje in ós aller naat.
’t Doert flaich lang, lever nog kót,
Tsezame zunt vier tse jans jet in sjtaat,
En verjès nit: ’t Kunt wal jód!
Paul Weelen, Kerkrade
Maart 2020
Wazel en Bazel
1.
De teng trekke, de maer dekke.
Sjpinnejaeger, viêgevaeger.
Sjarretelle en sardelle.
Belke trekke, kómp oêtlekke.
Häöskes breie, kledjes neie.
De jónge noêts niêpe,
zoêdet se neêt piêpe.
De jaeger duit ‘paaf’,
en ’t versje is aaf.
2.
De zeute deêm van Moder Koe
is vur eur kellefke klein
de hemel op aerd.
Wie vur de mins,
de zaochte naas van ein paerd.
Pietje pötje poêt,
mien versje det is oêt.
3.
In de trein van Wazel nao Bazel,
dao zoôt ein maedje van twellef
det leek op ein ellef.
‘Tante Loezewiês,
wets tich preciês
wat ter dao is in det Bazel?’
‘Eine waterval en
vuul sjaele Wazel!’
4.
Sjaan zienen haan
waar sjoënder as Sjaan zien vrouw
De hón van de vrouw van Sjaan
waar sjoënder as Sjaan.
Dao is vuul leid beej die minse
det duis tich tich neêt winse.
Vuul leid wasse neêt wets.
Hae waar eine kater
en zeej waar ein kets.
Godelieve van Gemen, Baarlo
Februari 2020
Duitse militaire begraafplaats Ysselsteyn
Aan de randj van de Pieël tösse törf en
zandj röste miens, vader, zoon, broor –
de oet hoes weggerope mansluuj
door de wraakzuchtige oearlogshoor.
Hie gein fieës mèt groeats herdinke
en genuuedje op de ieërste rie –
óm dees dertigdoezendj te gedinke
hingtj inkel de vlag d’r halfstek bie.
De jaore waere aojer – häör bèd alsmer
kaojer en vuuer de jóngste blieftj ‘t wènne
waal die foto op de sjouw te kènne.
’t Carillon striektj zien vlokke es millesien
uuever de geveulige litteikes in ’t gazon –
verzaochtj de in stein gekratsdje pien.
Har Sniekers, Thorn
januari 2020